వాన పడుతోంది

వాన పడుతోంది మనం ఏం చేద్దాం? 
వాన పడుతోంది మనం ఏం చేద్దాం? 

చిటపట చిటపట చినుకులతో చిందులేద్దాం 
మనం చిందులేద్దాం 
చిట్టి పొట్టి గొడుగులలో గెంతులేద్దాం 
మనం  గెంతులేద్దాం
జలజల పారే నీళ్ళల్లో పడవలేద్దాం 
మనం పడవలేద్దాం 
మిలమిల మెరిసే మెరుపులలో ఫొటోలు దిగుదాం 
ఫోటోలు దిగుదాం

వాన పడుతోంది మనం ఏం చేద్దాం? 
వాన పడుతోంది మనం ఏం చేద్దాం?
Posted in చిట్టి-పాటలు, పాటలు, పిల్లలు | వ్యాఖ్యానించండి

ఎటు చూడను, నా నేస్తం?

నువ్వు మూగవయ్యాక
నాకు పాట ఎక్కడిది?
నీ స్నేహం జారాక
నాకు శాంతి ఎక్కడిది ?

ఏవేవో అలజడులు
దిశ తెలియని పెనుగాలులు
నమ్మకాన్ని తుడిచేస్తే
ప్రేమ దివ్వెనార్పేస్తే

నువ్వు కనుమరుగైపోతే
నాకు నేనే కరువైతే

నీళ్ళు ఎండిన కనుదోయితో
నేనెటు చూడను, నా నేస్తం?
నీకై… చాచి ఉంచిన ఈ చేత్తో
ఇంక … ఏమి చెయ్యగలను, నా ప్రాణం?

 

Posted in నా రాతలు, నువ్వు-నేను, స్నేహం | 1 వ్యాఖ్య

కాలానుభుతూలకు అతీతంగా …

రోడ్డు రోలరు తొక్కుకుంటూ పోయింది
రాళ్ళని తనలోకి నొక్కేస్తూ, కుక్కేస్తూ
ఒక్క పిసరైనా ఖాళీ లేకుండా..

తళతళలాడే తారు రోడ్డైపోయింది తను
మీద వెళ్ళే వాళ్ళ వేగానికి
తన ఎగుడుదిగుళ్ళు అడ్డు రాకుండా …

ఇప్పుడే అడుగులేస్తున్నచిట్టి పాపలో
జల్లుకి తలలెత్తే గడ్డి పువ్వులో
తన దగ్గరకి వచ్చే ఊసే లేదిక …

చక్రాల దొర్లుడే ఇక పారిజాతాల స్పర్శ
పొగలూ గిగలే చంద్రకాంతాల సువాసన
వానైనా, ఎండైనా అన్నీ ఇక ఒకటే …

కాలాలకూ, అనుభుతూలకూ అతీతంగా
తళతళలాడే తను !
అందరికీ ఉపయోగపడేలా చక్కగా
నిగనిగలాడే తను !!

Posted in నా రాతలు | Tagged , , | వ్యాఖ్యానించండి

నా చిట్టి వర్ష

కలువల్ల కన్నుల్ల పాపాయి ఎవరు?
నా చిట్టి వర్ష …

తేనెల్ల పలుకుల్ల చిన్నారి ఎవరు ?
నా చిన్ని వర్ష …

మబ్బుల్ల బుగ్గల్ల అమ్మాయి ఎవరు?
నా బుల్లి వర్ష …

వెన్నెల్ల నవ్వుల్ల బుజ్జాయి ఎవరు?
నా బుజ్జి వర్ష …

Posted in చిట్టి-పాటలు, నా రాతలు, పిల్లలు | వ్యాఖ్యానించండి

నా నానీలు

చెంపలు జారినవి
రెండు చుక్కలే.
మనసు లోపల
ఎన్ని ముక్కలో!

~~~

బరువుల్ని
తల’లో’కెత్తుకుంటే,
చాలా రుసుములు
చెల్లించాల్సొస్తుంది.

~~~

నాకంతా నువ్వే
అన్నాను…
నీ కళ్ళలో
నిండుగా నేను…

~~~

అనుభవం
దారి చూపిస్తే చాలు.
వేలు పట్టుకుని
నడిపించక్కర్లేదు!

~~~

పొంగినా, పొరలినా
జారినా, జాలువారినా
మారేది రూపమే!
స్వరూపం కాదు.

~~~

గుండె గది
కాస్త ఖాళీ చెయ్యవూ?
షోకేస్ లోనుంచి
వచ్చేస్తా వెనక్కి…

~~~

లోపలంతా వెతికాను
లేనే లేదు!
కొని తెచ్చుకోబోతున్నా
అందాన్ని…

~~~

ఇల్లు ఇరుకురా
అన్నాడు మొహమాటంగా..
ఇల్లాలు కాదుగా?
అన్నాను నవ్వుతూ.

Posted in నచ్చిన కవితలు, నా రాతలు | 2 వ్యాఖ్యలు

తేడా ఎక్కడ?

అవే చెట్లు … 
నా లోని సంతోషానికి 
తలలూపుతున్నట్లు … 
 
అదే ఊపు … 
నా లోని సంఘర్షణలకి 
అద్దం  పడుతున్నట్లు  … 
Posted in నా రాతలు | వ్యాఖ్యానించండి

ప్రభు నువ్వే నువ్వే

అంతటా అన్నిటా ప్రభు నువ్వే నువ్వే

అణువూ అణువువై నువ్వే విడివడి
భిన్న రూపాలలో మళ్లీ కలిసి
సుందర జగమే రంగస్థలిగా ॥ అంతటా ॥

సంద్రం నుంచి ఎగసే కెరటమై
ఉరిమే మేఘమై కురిసే వర్షమై
నదులూ చెరువులూ జలపాతాలుగా
ఎన్ని రూపాలున్నా అది నువ్వే నువ్వే ॥ అంతటా ॥

మట్టిలో రేణువై మహా పర్వతమై
విత్తులో సారమై విష కంటకమై
శాంతివై కాంతివై మహా ప్రళయమై
ఎన్ని రూపాలున్నా అది నువ్వే నువ్వే ॥ అంతటా ॥

Posted in నా రాతలు, భక్తి | 1 వ్యాఖ్య